This site uses cookies in order to regularly improve the operation of the site. You declare that you agree herewith by using this website. Further information

OK
MITOLOGIA ED ISTORGIA

LA VISTGA EN LA MITOLOGIA NORDICA

Enturn l'onn 1220 scriva il scienzià islandais Snorri Sturluson l'istorgia mitologica da l'Edda. En l'ultim chapitel gioga la vistga ina rolla impurtanta. Qua in extract.

L'istorgia cumenza suandantamain: Baldur il bun ha nauschs siemis ch'el stoppia murir. El palaisa quai als dieus e quels decidan da proteger Baldur da tut ils privels pussaivels. Frigg, sia mamma, consultescha ina divinadra e quella la di che ses figl saja smaladì e ch'ils dieus n'al possian betg proteger. Frigg fa ina lunga glista da tut ils privels pussaivels e fa engirar il fieu, l'aua, la crappa, ils metals, las plantas, ils utschels, ils verms, ils animals da quatter chommas, las malsognas ed ils tissis da mai na blessar Baldur.

Per verifitgar l'invulnerabilitad da Baldur inventan ils dieus in nov gieu. Els sajettan da tuttas sorts chaussas sin el, plantas u armas. Ma tut fa in artg enturn el senza al blessar.

Loki, il figl da Laufey, vegn però schiglius. El sa travestgescha sco dunna e va tar Frigg a Fensal. El la tschenta dumondas raffinadas e vegn a savair ch'in dals elements n'haja betg engirà, cunquai ch'el era memia giuven: ina pitschna planta che sa numna vistga e che crescha datiers da Walhalla.

Plain odi tschertga Loki la vistga, la stgarpa or e va tar ils dieus. Quels dattan lur nov gieu preferì. El s'avischina a Hödur ch'è tschorv e che stat in pau a l'ur. Loki al dumonda, pertge ch'el na sajettia betg sin Baldur. El al respunda ch'el na vesia betg e ch'el n'haja betg in'arma. Loki al fa amogna da gidar, per ch'el possia era participar al gieu. Quai fa plaschair a Hödur. Loki al metta en maun il rom da vistga ed al inditgescha la direcziun da Baldur. Hödur tira il rom che tutga Baldur. Quel croda immediat mort per terra. Questa mort è stada la pli gronda disgrazia che ha tutgà ils umans ed ils dieus.


Funtauna: Die Edda III – Die Jüngere Edda des Snorri Sturluson. Tenor la translaziun tudestga ed ina schelta da Karl Simrock. Chasa editura Reclam, Leipzig 1944; p. 55–59.

You are leaving the website of Iscador AG

You are leaving the website of Iscador AG and are going to the website of another provider. The contents published there as well as their designs have been created without the assistance of Iscador AG and are subject to the exclusive responsibility of the other provider. Iscador AG shall not assume any liability for the accuracy, completeness and actuality of this information and possible consequences from their use. You accept the aforementioned information by continuing on to the external page.